劉明軒逆齡生長越嚟越靚，又經常去瑜珈健身中心操fit副偈，告別單身一定無難度啦，係驚佢有要求眼角高啫，話晒佢曝過光嘅男伴，個個非富則貴喎，而且單單都好鬼爆添！
曝過光嘅，有恒生銀行創辦者後人何乃斌，本來二人03年拍拖時無人知，但09年男方入稟法庭，向女方追回拍拖時共同持有嘅淺水灣豪宅業權，關係先至浮面。據知劉明軒拍拖一個月已經逼婚，分手後又唔肯交返豪宅業權，但劉明軒被指只係信託人身份持有，最終男方喺11年奪回全部業權。
做唔成恒生家族新抱，劉明軒貫徹打鐵趁熱風格，13年同曾任3屆仁愛堂總理，以及友邦區域總監嘅王傲山閃婚，但一年未夠已經離婚。直到前夫王傲山再婚，劉明軒忽然話當年，指自己一年內被老公三度趕出門口，言語中暗示王傲山情緒、脾氣有問題。對於前夫與新婚妻子好sweet，佢仲話：「佢對我未sweet過咩？有啲嘢係日久見人心，路遙知馬力。」
17年仲爆！《壹》仔獨家發現當時39歲嘅劉明軒，同57歲人夫、曾任多家上市公司非執董嘅盧永仁，11日內出入同一住宅大廈六次。劉明軒不時戰鬥格現身，男嘅會買埋外賣上樓，女方就準備餐具，但通常都係前後腳好警覺。不過短聚兩小時後，佢哋有時都會忘形吻別，錫完先各自揸車離開。事件曝光後，盧永仁對外澄清只係生意夥伴。完！
立即下載Apps，隨時隨地睇盡時政專題、深度偵查、娛樂熱話！按此連結： http://bit.ly/next28app
相關新聞：【揀仔有一手】41歲劉明軒搭上廖碧兒有米前度 步出酒店再吻別 http://bit.ly/2XHtPIK
來源 source: http://s.nextmedia.com