愛女許惠菁（Charmaine）喺身邊，Benz雄點解扁晒嘴咁呀？梗係啦，見Charmaine全程只係黐住男友Shane，都冇乜理自己，做老豆嘅，唔只心酸，仲心碎添呀！呢日Benz雄同老婆龍嬿而、外母、Charmaine及未來女婿齊齊行商場，十足一家人咁好溫馨。一行5人行去coffee shop，Charmaine同Shane揀完嘢，就等Benz雄埋單，Shane似乎唔係好識擦未來外父鞋喎！有途人認得佢要求合照，原本冇晒表情嘅Benz雄，即刻笑住影相，好專業呀！畀錢不特只，仲要自己拎埋嘢飲，好彩Charmaine醒目，即刻行出嚟幫老豆手。
唔講唔知，原來Benz雄舊年已經舉家移民咗去新加坡，住喺當地嘅義順南區，呢年幾佢都係兩邊飛。喺浸會大學讀傳理系嘅Charmaine，今年就會畢業，男朋友Shane係新加坡人，兩個讀書時候識嘅，拍咗4年拖喇，同許氏一家上下相處好好，Benz雄當正佢係未來女婿。點解會移民新加坡呢！話說Benz雄喺80年代去當地做嘢，邂逅咗失婚嘅龍嬿而，拍拖7年後結婚。龍嬿而係羅樂林老婆陳寶儀嘅親家姐，亦都係咁，許氏一家同羅氏一家勁老友。而Charmaine喺新加坡出世，到5歲大嘅時候，同媽咪齊齊去咗香港住，讀新加坡國際學校。老婆係土生土長新加坡人，外母又喺當地住，Charmaine男友又係嗰邊人，70歲嘅Benz雄準備退休後長居新加坡，都好合理吖。有兩個物業喺新加坡，Benz雄呢幾年閒唔時都有返去住，當渡假咁！
攝錄：吳斯金
立即下載Apps，隨時隨地睇盡時政專題、深度偵查、娛樂熱話！
按此連結： http://bit.ly/next28app
相關新聞【家族巴閉到你唔信】Benz雄太公係慈禧太后契仔 大作家魯迅係姑丈 https://bit.ly/2TiX6dx
來源 source: http://s.nextmedia.com