【曾放縱晚晚飲酒飲到嘔屎】做完手術無晒job 65歲駱應鈞:而家唔做,過多幾年擔心身體承受唔到|即日娛頭 _.,駱應鈞,

過多幾年擔心身體承受唔到|即日娛頭有睇電視嘅人,一定認識駱應鈞,65歲嘅佢入行超過40年,喺無綫拍咗超過100套劇集,11年離開無綫後去咗HKTV拍劇 ...


過多幾年擔心身體承受唔到|即日娛頭

有睇電視嘅人,一定認識駱應鈞,65歲嘅佢入行超過40年,喺無綫拍咗超過100套劇集,11年離開無綫後去咗HKTV拍劇。HKTV不獲發牌,佢再轉陣北上發展,駱應鈞接受蓋世寶訪問時話,剛做完人生第一次嘅手術,前後休息咗四個月,而家已經康復。

蓋:歡迎今日嘅嘉賓駱應鈞先生,鈞哥哥你好,我哋未合作過,今次係第一次。

駱:未呀,多謝你邀請我。

蓋:鈞哥哥係咪啱啱做完手術?

駱:其實嗰個手術真係打破咗我好多第一次,我係第一次入醫院,以前從來未住過醫院。舊年因為有位醫生朋友,講起檢查心臟血管,我話好呀,叫佢幫我安排,檢查後發現三條主血管都好好,但話我好似有啲腎石,因為掃描咗上身位置,佢話心臟同肺都無事,但因為會照到少少腎,佢話好似有腎石,我就再照一次腎,之後醫生朋友就介紹咗一位泌尿科外科醫生俾我,醫生話咁大嘅腎石一定要做手術,同埋因為分布原因,所以要分兩次做。聽駱應鈞講,佢呢次手術嘅過程,前後用咗四十幾日。

駱:因為我喺醫院第一日做完手術要休息幾日,導管、引喉都唔可以掹走,然後七日之後再做第二次,總之成個手術連埋住院總共十幾日。但仲牽涉到一樣嘢,就係手術之後腎臟仲會留低一個支架,又要一個月後再移除,總之成個過程就用咗四十幾日,而家已經無乜事,經過咗三、四個月,而家已經好番晒。

休息咗一段日子,駱應鈞話搵開佢拍嘢嘅人突然冇晒。

駱:但係嗰段時期有啲工作接唔到,亦都費事同人解釋發生咩嘢事,唔知點解,呢段時期就靜咗好多,但都無所謂,既然啱啱做完一個手術,咪趁呢個時候休息吓囉。

蓋:太太有冇好擔心你?

駱:醫院好近我住嘅地方,同時佢會有啲擔心,但我就啱啱相反,因為之前醫生叫我考慮做唔做手術,因為唔做手術,就可以每年去做檢查,或者食藥,當時我要考慮嘅係,如果而家唔做,到將來嚴重咗嘅時候,年紀又再大幾年,我擔心身體承受唔到,我衡量過覺得當時仲可以,所以就做咗手術。蓋:唔知你記唔記《十兄弟》裡面,你講咗句英文呢?

駱:當時嘅製作總監梁家樹就召我返去,原來之前發生咗好多事,因為呢件事之後,佢哋返去反覆睇帶,但係梁家樹擔心自己聽錯,梁家樹係製作總監,手下有八、九個監製,叫晒所有監製嚟聽,聽母帶嘅時候係完全無事嘅,但係唔知點解混咗音之後就會變咗英文,當時仲有啲陰謀論,話係咪俾人hack咗入嚟然後改變咗,佢叫我返去嘅時候,我話唔好諗咁多喇,直接重新配音啦,因為將來可能會重播,所以就再重配。

蓋:原裝嗰句係點樣?

駱:類似係「點解唔通知我」,係好正常嘅,所以到而家都真係一個無頭公案,因為到重配當日,入到配音室再聽多一次,連收音技師都話可以唔使再配。總之我哋就係唔明,當日混音出街後就變咗咁嘅效果,所以其實都幾冤枉,我係完全無講過「call」字,但唔知點解個音就變成咁樣,即係你諗唔到會係咁樣囉,所以其實係好無稽,大家都唔知道係咩原因。

蓋:其實成句說話都好順口,你覺得啲觀眾係咪醒目咗?

駱:唔係,因為有段時期佢哋開始捉錯處,譬如睇吓你有冇古裝著咗時裝鞋,或者畫面入面有個汽水罐,即係流行咁樣做,但其實呢啲情況,唔係講英文,但類似嘅,其實都唔知發生咗幾多次。

策劃:肥A

攝錄:黃志明、吳斯金

化妝:毛毛(嫁妝)

立即下載Apps,隨時隨地睇盡時政專題、深度偵查、娛樂熱話!

按此連結: http://bit.ly/next28app




來源 source: http://s.nextmedia.com