全家出動到賀 偉仔笑唔停領法國勳章
梁朝偉20歲投考藝訓班，至今33年的演藝生涯，獲獎無數，昨日偉仔於法國駐港領事官邸，獲頒法國藝術與文學軍官勳章（Officier），由太太劉嘉玲、母親、外母與一眾好友的陪同下接受勳章，令他開心笑唔停。嘉玲對丈夫領取如此崇高榮譽的勳章引以為傲，她更以「香港資產」來形容偉仔，希望大家加以保護。
為表揚對電影藝術的傑出成就，梁朝偉昨日於法國駐港領事官邸領取法國藝術與文學軍官勳章，他亦是首位獲此勳章的華人男演員。偉仔由太太劉嘉玲陪同下恩愛出席授勳典禮，偉仔的母親、外母、妹妹與妹夫等均有出席，而一眾好友包括沈嘉偉、邱淑貞、曾志偉、呂方及鍾鎮濤夫婦等亦出席支持好友授勳，晚上大家一同到灣仔君悅酒店，由偉仔請吃意大利菜慶祝。
【軍官勳章】■梁朝偉（右）昨日獲法國駐港澳總領事柏雅諾，頒發法國藝術與文學軍官勳章。
【深感榮幸】■偉仔昨獲頒勳章後，笑謂既開心又榮幸。
【欣賞勳章】
「與太太及家人分享」
昨日下午典禮儀式開始，偉仔獲法國駐港澳總領事柏雅諾授勳後，在台上以英語致謝辭：「這個榮譽要與我的太太及家人分享，謝謝！」之後偉仔接受訪問，提到感受，偉仔笑說：「好開心、好榮幸，呢個唔係只係對我，係對我之前拍過嘅香港電影嘅肯定，電影唔可以一個人拍，應該同之前合作過嘅人分享。」
【嘉玲錫錫】■偉仔獲太太劉嘉玲錫錫，她更拿着勳章細看。
本月27日便是偉仔的53歲生日，他表示還未有慶祝計劃，他說：「未諗去邊，𠵱家都未開工，準備緊新電影嘅前期工夫，因為要講國語，係一個南京發生嘅故事，等緊王大導（王家衛）嘅劇本，開始要搵老師練國語，熟咗先至拍會好玩啲，冇咁大包袱，希望一開工唔好停，兩個月拍晒。」問到是否預多點時間？偉仔說：「今次係第二個導演拍嘅，所以唔係好擔心。之前拍過好多drama都好沉重，今年會拍三部戲，都係喜劇，一部南京嘅愛情喜劇，第二部係動作喜劇，第三部推理喜劇，今年內會拍晒，三部電影題材我都鍾意，係一種緣份。」
【舉杯慶祝】■王家衛夫婦到法國領事官邸，大家舉杯祝賀偉仔。
【家人見證】■嘉玲與偉仔雙方的家人，均有出席支持授勳典禮。
嘉玲：我性取向正常
早前網上傳出嘉玲跟同性密友鄧霓儀經常走在一起，更指二人另築愛巢，問到偉仔有沒有影響心情？他說：「我哋幾十年，乜嘢風浪未見過？」嘉玲昨日以全黑色連身裙的高貴打扮，與偉仔的全黑西裝襯到絕亮相，嘉玲更在場吻賀偉仔，她說：「好開心！我同你哋一樣。」雙喜臨門？她說：「嗰個（封舞台劇后）已經係一個月前攞。今次好開心，身為香港人，唔係屋企人，有個咁傑出嘅人，對中國、法國藝術得到認同同貢獻，覺得好驕傲。呢個獎係終身嘅榮譽，香港呢啲資產，要好好地去保護。」
提到因同性好友鄧霓儀過從甚蜜，傳出婚姻亮起紅燈，嘉玲說：「傳都傳個make sense。」會否影響與鄧霓儀關係？她說：「我暫時性取向正常，因為明天唔知發生乜事㗎嘛。」
採訪：溫敏芝
攝影：仇志德
【新紮師兄】■「發福高佬泉」呂方賀杰佬梁朝偉，偉仔至今仍弗爆。
【老友力撐】■鍾鎮濤與太太范姜昨晚到君悅，出席偉仔授勳派對。