曾經都叫做有過吓名嘅姊妹組合2R，早幾日喺銅鑼灣再次以孖公仔姿態現身，而且身邊仲多咗個肌肉男添！
2R嘅家姐Rosanne就嫁咗有錢牙醫，細妹Race就打入商界搵銀，兩姊妹都有「錢」途，high tea當然都要高貴啲，早幾日佢哋就去咗銅鑼灣專賣名牌嘅利園商場飲下午茶，同行仲有個肌肉男同佢哋雞啄唔斷。
已經生咗兩個仔嘅Rosanne，身形keep得咁fit係有付出架，成餐都見佢冇乜掂過啲甜品，連飲品都冇，相反阿Race就豪飲卡路里高過姚明嘅朱古力奶，望落又好似幾正咁喎。
嘆完茶，吹完水，兩姊妹就去咗誠品買書，冇幾耐已經有斬獲。睇真啲，佢兩個都真係keep得幾好，加油，過多幾年就合資格做美魔女架喇！