球王病逝 克勤懷念胡國雄爽朗玩得
香港一代球王胡國雄昨日凌晨因癌病逝世，終年66歲。人稱「大頭仔」的胡國雄一生不僅與足球圈中人相熟，退役後更是香港明星足球隊的中堅分子，經常跟譚詠麟（阿倫）、曾志偉、李克勤和梁漢文等一班明星足球隊隊友馳騁足球場。阿倫、克勤、梁漢文等一班戰友懷念當日跟胡國雄球場上並肩作戰點滴，盛讚胡國雄傳波技術出神入化；克勤指胡國雄又爽朗又玩得，並謂：「希望佢去到另一個世界都好開心踢波，搵埋尹佬（尹志強）一齊。」
胡國雄昨日凌晨因癌病逝世，香港球壇失去了一位極具代表性的靈魂人物，譚詠麟、陳百祥、曾志偉、李克勤和梁漢文等香港明星足球隊成員，也失去一位曾並肩作戰的好友。胡國雄80年代退役後加盟香港明星足球隊，負責中場位置，早年不時跟阿倫、陳百祥、曾志偉、李克勤等馳騁足球場，雖然過去十年胡國雄已甚少落場踢波，但仍不時跟眾明星足球隊好友飯局聚會，胡國雄離世，一班昔日戰友均深表難過。
【1949-2015年】■一代球王胡國雄昨日凌晨病逝，其出神入化的傳球技術及球場上風采，將永遠留在香港球迷心中。
阿倫：過波技術高
克勤昨日出席尖沙嘴的演唱會記招時，透露前晚一直有留意胡國雄情況，直至凌晨獲悉對方離世，深感難過。克勤說：「之前略略知道佢病情，我細個有睇胡國雄踢波，我以前係擁南躉，佢係精工，當時係敵對，但我對佢球技、球品係五體投地。到佢退休之後，佢同明星足球隊一齊出外比賽，發覺佢係好玩得嘅人。好記得有次喺飛機見過一篤剃鬚膏擺喺佢個頭，邊個整我唔知，佢就瞓咗覺。佢係一個好玩得好爽朗嘅球壇前輩，同佢踢波，無論我走去邊，佢個波都交到我腳前面，好厲害。每個喜歡足球嘅人聽到呢個消息都唔開心，希望佢去到另一個世界都好開心踢波，或者搵埋尹佬一齊踢波。」
跟胡國雄相交多年的阿倫昨說：「香港除咗我爸爸嗰代球員，我覺得張子岱同胡國雄傳波同過波嘅技術係神乎其技，永遠喺人哋死腳腳邊過，技術高超。我曾經係精工82球迷會會長，同好多球迷都話，只要嗰場球賽開場15分鐘，胡國雄帶波過半場入禁區，嗰場波就一定贏。」
■胡國雄大前年與譚詠麟、曾志偉、陳百祥及精工班主黃創山出席精工82三十周年晚宴。
■李克勤昨大讚胡國雄性格爽朗，球場外是個十分玩得之人。
■今年3月胡國雄（中）跟資深足球評述員何鑑江（右）出席精工82活動時明顯消瘦不少。
梁漢文：求佢落場
梁漢文舅父尹志強曾是胡國雄好拍檔兼好友，熱愛足球的他從小便視胡國雄為偶像，梁漢文說：「希望佢喺另一世界搵到以前波友，繼續享受佢嘅足球。佢係我好欣賞嘅香港足球先生，之後因為明星足球隊同佢接觸多咗，覺得佢好有親切感，因為98年跟佢同明星足球隊去法國睇世界盃，嗰次同佢溝通多咗，平日佢份人好沉默寡言，識耐咗發現佢講嘢語調好豪氣，好有親切感。」
梁漢文續說：「我成日問佢以前踢波嘅嘢，自己細個成日入場睇佢同舅父踢波，又問佢以前點樣練波。佢落場比賽，有時唔係好舒服、感冒唔係好想踢，教練都出盡辦法求佢，因為佢對球隊實在太重要，記得佢曾經試過好病，冇乜力唔係好想踢，結果俾人求到落場支持球隊，呢個證明佢喺球隊嘅重要性。第一次同佢踢波深刻到不得了，好似發緊夢，記得佢畀直線我入波，真係呢世難忘。」
米雪是明星足球隊啦啦隊成員，也是「亞洲第一中鋒」尹志強的女友，尹志強生前跟胡國雄交情不淺，身在內地工作的米雪昨日在電話中獲悉胡國雄病逝時，感到愕然和難過：「你講畀我聽先知，同尹佬一樣懷念佢，佢哋好老友，最難忘佢哋嗰種兄弟情，佢好幫兄弟，好爽、好有義氣。」
■梁漢文（右）寄望胡國雄去到另一個世界，繼續開心踢波。微博圖片
林敏驄後腳學到足
吳國敬也曾跟胡國雄做波友，他大讚對方是個出色球員，指早期胡國雄會「踢兩腳」，其後身體欠佳而較少落場，但就不時跟對方食飯碰面，他說：「佢好隨和，我好尊重佢，香港球王當之無愧。希望佢家人節哀順變，我哋好懷念佢。」林敏驄亦大讚胡國雄是天才和最好波之人：「我所有後腳都係學佢，佢係唯一讚過我嘅球王。印象中，佢以前成日都擔住支煙練波，天才波啟蒙咗我。佢早年都有出嚟跟大家食飯同睇我哋踢波。佢話唔踢就唔踢，好有型！」
採訪：馬建華、魯吉、皓騫
攝影：陳俊強
■胡國雄五年前與眾球場上戰友及明星足球隊成員送別尹志強，想不到他昨日也因癌病離世。
【全城悼念】李珊珊：個個崇拜佢
一代球王胡國雄昨日凌晨離世，終年66歲，他出神入化的球技以及為人樂道的球品，都活在球迷及一班圈中好友心中，永垂不朽。
李珊珊：
我成班朋友係足球圈嘅人，所以同佢會接觸到，有段時間都經常見面飲酒食飯，但近呢五、六年冇乜機會見。生老病死係必經階段，但好唔捨得囉，希望大家會搞番啲活動紀念佢。佢喺我眼中係個偉大球員，好有王者風範，佢好得到朋友認同，個個都好尊重佢、崇拜佢。
范振鋒：
識咗大佬（胡國雄）都20年，我哋仲試過一齊去德國睇世界盃，我同大佬又落場踢過波，佢腳法好勁，除咗踢波叻，猜枚都冇輸，佢擅長猜發財枚，我唔夠佢猜，大佬話就我猜十五二十，佢個人好幽默好好玩，聽到佢死訊，我好難過。
黃杏秀：
大頭哥，你是香港足球界的英雄。
阮兆祥：
他是我兒時的偶像，他是四屆香港足球先生，他是我心中的香港球王，他的球技甚至獲得外國球星的稱讚……胡國雄先生，一路好走……
黃貫中：
胡國雄先生，願你一路走好 ！
李力持：
香港球王胡國雄好波，永遠懷念傑出前輩戰士英雄。
苗僑偉及戚美珍：
香港的一代球星！他代表香港足球輝煌年代，他的足球「插花」技術無人能及，他是香港永遠的球王！胡國雄先生一路好走。