袁彌明真係工作狂，連行路都掛住覆Message。咁積極向上，難怪佢話從來唔會想像自己失敗，領袖唔可以再分男女，仲諗男女領袖各有乜嘢特質，其實係貶低自己，成功與否冇男女之分喎。
向來目標明確，抵佢由一個租二百呎舊樓嘅港女，變成依家居於自置千五呎跑馬地豪宅。
由炒細價樓同期指賺第一桶金，到依家擁有一間上市公司。股價高峰期，公司市值9億，以持股量計算，袁彌明當時身家大約7億。依家股價回軟，公司市值得番3.3億左右，佢嘅身家亦縮到2.3億左右。
不過佢話自己冇賣股票，升跌對佢冇影響。其實佢係公司主席兼CEO，每年袋人工197萬，都幾和味！
佢以前話過唔請用Yahoo mail同hotmail嘅人做助手，因為忍受到咁慢嘅電郵系統，嗰個人都唔慌有效律。
佢向來敢言，曾話做大事嘅男人點會上高登打嘢。最近講起，佢仍然堅持閒人冇嘢做先會上高登嘅睇法。
對其他人好辣，但係佢嘅強勢唔會用喺老公身上，同老公講嘢一定要用BB聲撒嬌。
佢話老公唔係特別想要小朋友，加上佢好需要有自己嘅空間，所以決定唔生仔喇！
將來百年歸老，佢會將財產成立基金，幫助有需要嘅人。
立即下載Apps，隨時隨地睇盡時政專題、深度偵查、娛樂熱話！按此連結： http://bit.ly/next28app
相關新聞：【史上最夠薑挑戰TVB港姐】38歲袁彌明寸節目膚淺 再質問高層 搞「全球反TVB大聯盟」│即日娛頭
http://bit.ly/2UfSp4F
來源 source: http://s.nextmedia.com