陳國坤買7個包餵妻 黃伊汶肚凸凸飄孕味
【中環】圈中喜事停不了，繼徐子淇、姚樂怡、鍾麗淇先後宣佈有喜後，去年與陳國坤（小龍）拉埋天窗的黃伊汶（Emme），昨日亦被發現着住鬆身裙肚凸凸跟老公現身中環。Emme疑似有喜，小龍更小心翼翼拖實她，之後兩公婆又到麵包店狂掃7個包，似足大肚婆好胃口。
現年34歲的黃伊汶，去年10月跟陳國坤在印尼峇里舉行婚禮後一直努力造人，眼見好姊妹應采兒和鄭希怡等輪流生B，早前她接受電台訪問時亦坦言家人催促添丁，希望生個跟自己同是猴年的BB，又笑指工作可以跟造人同步進行，明顯恨生BB恨到出晒面！今年6月Emme跟小龍到歐洲補度蜜月，未知此行是否如願以償造人成功，昨日Emme現身中環時，穿上鬆身裙，而且更肚凸凸，孕味甚濃！
昨日下午4時許，Emme孖住老公小龍乘七人車前往皇后大道中，夫婦二人齊齊穿黑色衫及帶住黑超，打扮襯到絕。落車後，小龍小心翼翼拖住老婆過馬路，記者見Emme穿平底鞋和鬆身裙，雖然她手腳看來仍算纖幼，但就覺肚凸凸。之後Emme與小龍走進戲院里附近的德成大廈，由於該大廈診所、律師行林立，小龍疑似專程陪老婆去看婦科。
【中環 4:00pm】
【體貼拖妻】
■陳國坤昨日跟老婆黃伊汶一身黑衣黑超現身中環，並小心翼翼拖住老婆過馬路。
【狂掃麵包】
■兩公婆在美心狂掃7個麵包，令人懷疑黃伊汶大肚，似足孕婦般好胃口。
【腹部微隆】
■正在揀飲品的黃伊汶雖穿上鬆身衫，但見她肚凸凸孕味十足。
【平底洩密】
■黃伊汶着住平底鞋，與老公陳國坤疑似到中環大廈睇婦科。
着平底鞋出入
兩公婆在大廈逗留半小時左右離開，然後到附近美心買麵包，見小龍夾完一個又一個，埋單時盤上放滿了7個麵包和兩支飲品，似乎Emme真的有喜變得大食。買完包後，小龍便偕老婆乘車離開。
記者昨日致電Emme，求證她是否懷孕及睇婦科，她說：「唔係睇婦科，梗唔係大肚。」莫非因為BB未夠三個月，怕小器關係所以不便公佈？Emme說：「真係唔係呀！」對於穿着平底鞋出入，她笑謂：「唔係做嘢嘛！」問有沒有生B計劃及何時公佈喜訊時，她說：「有先講。」
採訪、攝影：羅德光、皓騫