Kelly湊兩子遊迪士尼嗌攰「佢哋精力無窮」
樂壇天后陳慧琳（Kelly）前日卸下濃妝華衣，以簡約打扮湊「蝦餃仔」劉昇和「小龍包」劉琛到迪士尼樂園耍樂，同行未見老公劉建浩（Alex），Kelly一拖二都應付自如，還陪3歲小龍包騎旋轉木馬。年底在紅館開個唱慶祝入行20年的Kelly笑言，湊兩子出遊，消耗的體力等同排舞一樣的攰。
陳慧琳和老公劉建浩育有一對寶貝仔，分別是6歲蝦餃仔劉昇和3歲小龍包劉琛，熱愛家庭的Kelly，沒工作就黐屋企陪仔，正值暑假，她當然給囝囝安排了戶外活動。讀者焦小姐前日直擊到Kelly母子在香港迪士尼樂園family day，昨日透過《蘋果》爆相爆片與大家分享。
【前日 潮媽出馬】
■Kelly前日帶子到迪士尼，還陪幼子小龍包騎旋轉木馬。
讀者提供圖片
【影批靚相】
■Kelly拿着手機拍下囝囝玩樂情況。
【母子行裝】
■Kelly和友人帶四名小朋友遊園，穿橫間tee殿後是蝦餃仔。
母子騎木馬
據焦小姐報料，前日下午4時許碰見Kelly與另一名女友人，帶着四名小朋友遊園，她一眼認出金毛頭、化淡妝的Kelly，跟住發現她的兒子蝦餃仔和小龍包，打扮隨意的Kelly雖架上黑超，但仍被遊客認出上前要求影相，但她都以私人時間為由婉拒，即使老公Alex不在場，Kelly對兩子仍照顧得妥妥貼貼，而迪士尼也安排了工作人員陪同。
今年2月，本報拍到Alex獨自湊兩子玩轉中環友邦歐陸嘉年華，當時Kelly要返內地工作未有同行，前日輪到老公沒空，不過Kelly湊仔也不遜老公，小龍包先坐BB車入場，其後下車自己行，由Kelly拖實，哥哥蝦餃仔則緊貼身邊。兩子玩得興高采烈時，Kelly便拿手機拍攝，其後囝囝玩機動遊戲，Kelly更與小龍包一齊騎旋轉木馬，母子玩得好投入。
■正籌備個唱的Kelly，日前往錄音打扮都型格十足。微博圖片
愛機動遊戲
記者昨日致電Kelly，她表示兩子最愛主題公園，遊園是長假期的指定動作，一年總去兩、三次，她說：「Alex噚日要做嘢，我咁啱有時間就湊囝囝入場玩，佢哋好鍾意㗎，最鍾意係玩機動遊戲，玩完又玩。」Kelly親力親為陪兩子玩，可覺筋疲力竭？她搞笑說：「幾攰㗎，佢哋精力無窮，但習慣咗，消耗體力同排舞有得揮。」
今年是Kelly加入樂壇20年，將於12月18至22日在紅館開騷，近日已開始排舞練歌，Kelly說：「我等咗七年再開騷，好緊張，好期待，一定要做到盡善盡美。雖然仲有幾個月，但我想有足夠時間去排練，唱多啲快歌，所以呢幾個月我必須養精蓄銳，以最佳狀態同歌迷見面。」
採訪：陳杰
【2月 型爸拉隊】
■Alex今年2月獨自帶兩子到中環嘉年華耍樂。
資料圖片