身為香港超級鑽石筍盤的李澤楷（小小超），現年53歲的他仍是無腳雀仔，跟舊愛梁洛施育有三子，包括現年10歲的大仔Ethan和一對9歲的孖仔，李澤楷和梁洛施分手9年，今日兩人激罕合體現身，到大埔撐兒子李長智參加武術比賽，李澤楷睇兒子比賽時表現緊張，又拍手又摸頭，慈父樣盡現。
「2020全港校際武術公開賽」今日在大埔的American School Hong Kong舉行，讀者陸小姐在現場見到李澤楷、梁洛施和李長智「一家三口」，透過「爆相爆片」分享他們的溫馨時光，陸小姐接受《蘋果》電話訪問表示：「今日下午大約3點，我首先見到梁洛施同囝囝，仲有兩個保鑣喺度，之後就見到李澤楷，佢哋可能分開到場。」
從讀者提供的比賽場刊中，發現兩人的兒子「李長智」，報名參加男子「初級棍術」，屬「學校組小三至小四」，陸小姐說：「梁洛施好緊張，拖住個仔，李澤楷仲幫囝囝整理武術衫，父愛出晒嚟，唔係好嚴肅，雖然囝囝黐阿媽多，見到佢同爸爸關係都OK。」據片段顯示，李長智亦有參加拳術比賽。
手長腳長的李長智，表演舞棍時虎虎生風，十分淡定，沒有失手，而站在場邊觀看的李澤楷，又摸頭又搓下巴，似乎比兒子更緊張，還不停拍手為兒子打氣。而在等賽果期間，兩母子坐在草地上，用手輕掂着兒子的腳仔，雖然梁洛施戴了口罩，但都看到她的眼睛在笑。
李澤楷和梁洛施雖然分手9年，但為了兒子仍保持聯絡和見面，不過，有現任女友港姐郭嘉文的李澤楷，跟舊愛只保持「家人」關係，陸小姐說：「佢哋企埋一齊，但唔覺有太多傾偈，亦都冇其他家長埋身，囝囝斯文定性，似阿媽多。」
來源 source: http://hk.entertainment.appledaily.com