掃玩具買衫仔又抱又啜 黎姿孻女賣萌扭計坐地
現年43歲的幸福人妻黎姿，前日帶兩歲半孻女Pegella到中環享受購物樂，不怕被捕捉的黎姿全程都是為囡囡揀選玩具和新衫，明顯將心肝寶貝放在第一位，囡囡肥嘟嘟眼睩睩超可愛，還有一道又黑又濃的招牌「黎姿眉」，兩母女啜啜錫錫超溫馨，不過，可能囡囡年紀太細沒耐性又眼瞓，有時扭計不肯試衫，坐在地上扁嘴撒嬌表現天真，要媽咪親自出馬又𠱁又抱。
黎姿於2008年嫁給富商馬廷強後，全面息影專心做人妻，三年抱三的她先後誕下快滿5歲的孖女馬家蔚、馬家鎂及兩歲半孻女Pegella，一家五口幸福滿瀉。3名女兒逐漸長大要融入社會，黎姿沒有刻意收埋囡囡避免曝光，近年大方帶女兒出巡見世面。兩個月前被網民在中環捕獲一家大細high tea後，前日黎姿由傭人陪伴下，帶孻女Pegella到中環行街購物，相信孖女因要返學未能同行。
【中環 前日4:00pm】
【抱女出巡】
■黎姿前日抱着孻女Pegella到中環買玩具和童裝，全部戰利品都是屬於3個女兒，果然是廿四孝母親。
【開心彈琴】
■Pegella在玩具店流連忘返，索性坐在地上玩琴仔。
【親親媽咪】
■黎姿和囡囡玩啜啜錫錫，母女情深。
不耐煩撥開裙仔
前日下午約4時許，黎姿挽着價值約25,000元的Givenchy Antigona豹紋手袋配襯金錶，與孻女現身中環太子大廈的玩具店，當時黎姿正在收銀處等付款，眉粗粗似足媽咪的Pegella，與同齡小孩一樣最愛玩具，在店內玩到意猶未盡，索性坐地玩琴仔，最後店員幫忙搬大型廚房玩具落樓上車，黎姿抱起Pegella啜啜錫錫，再轉戰第二站去名店Ralph Lauren買童裝衫。
擁有3名女兒的黎姿，當然最愛幫囡囡扮靚，她在店內周圍行攞衫拼在Pegella身上，不過年紀小小的Pegella愛玩具多過愛衫，只有兩歲半的她真情流露表現不耐煩，當黎姿攞一條紅色格仔裙拼在她身上，Pegella扭計伸手撥開裙仔，母性大發的黎姿伸手抱抱作狀𠱁女，Pegella乖乖地雙手攬實媽咪，之後黎姿拖住她行去第二個櫃位，再攞另一條藍色碎花裙，踎低幫囡囡拼上身，Pegella先扁嘴搖頭向後行，再乖乖行埋媽咪身邊，將一條黑色格仔裙拼上身，十分可愛。
【隨意試衫】
■Pegella似乎對扮靚沒甚興趣，只隨意地拿起衫仔看看，沒耐性試衫。
【扁嘴想喊】
■Pegella被傭人扮彈面恫嚇後，坐在地上扭計扁嘴欲哭。
扮鬼臉扁嘴撒嬌
不過，當黎姿行開揀衫時，由傭人幫Pegella試着新衫，Pegella再扭計揈開衫仔，傭人似乎沒甚耐性，竟趁黎姿不在附近，不但手指指似罵小主人，更偷偷伸手向小主人扮彈面，眼矋矋的她樣子有點凶惡，雖然傭人只是恫嚇，沒有真的傷害到Pegella，卻已令Pegella發脾氣扭計，對鏡扮鬼臉，又坐在地上嘴扁扁撒嬌似哭，狀甚可憐。
之後黎姿親自出馬又𠱁又抱，店員又拿圖書給Pegella睇，終於𠱁掂囡囡，當時黎姿還不知囡囡曾被傭人扮彈面，與傭人有講有笑，最後由黎姿抱着囡囡，傭人負責攞戰利品及代黎姿挽手袋離去。
採訪、攝影：梁繼光
【滿載而歸】
■黎姿幫囡囡們買了大批玩具，要店員幫手搬落樓上車。
■黎姿早前帶愛女與友人high tea，她離開前先和孖女講拜拜。資料圖片