「喂唔好講咁多，最緊要人有事，飲杯！」言猶在耳。瘟疫之下，自周四（20日）有首宗警員確診武漢肺炎消息爆出，形同久旱逢甘霖，網上以至街外都掀起慶祝風潮。「#三萬thanks」等創意標籤陸續流出，人人琅琅上口，而即使市道不順，黃圈商戶堅持推出優惠產品同賀。同陷瘟疫恐慌，民間氣氛卻比沙士時期差天共地，資深傳媒人分析，17年前警隊仍願奮不顧身協助抗疫，今日只反映出警員「貪生怕死」，而港府亦事事「一國」為先。臨床心理學家直言現象源於公眾8個月來的長期壓抑，警隊堅持負面形象，除推獨立調查等轉機，否則料全民仇警不會告終。
記者 鄧溢禧
同仇敵愾，無論面對武漢肺炎壓境，抑或過去8個月警暴連連的不忿。本月20日爆出首宗警員確診，連登討論區即「開花」鋪天蓋地訴說心情，或是熱烈祝賀。「梗係第一時間開香檳啦，#RAP」，陳小姐坦然承認，得悉消息一刻興奮無比，又指數月來「佢哋做乜都okay，市民做乜都唔okay」，不斷剝削令市民受苦。
另一市民Ada則指「飯聚集團」（指確診警員18日曾赴的警官退休飯局）料令越來越多人確診，「有幾個警察就幾個中招」。她強調今日武漢肺炎找上警員，形容是上天對警員當日濫打市民的報應，「我相信香港人都會開心」。
光榮冰室亦即推出「武警飯」套餐，賣45元每日限量30,000客，指要紀念警員搖身一變成真正「武漢警察」。日銷3萬碟迅速售罄，惟負責人Glory亦指，同時也面對藍絲群眾狙擊，批評他做法冷血，他直言已絕耳不聞藍絲談吐，「連1+1=2佢哋都會話錯」，不會再花心力說服對方。他續指「武警飯」套餐也只不過一客椒鹽豬扒飯連飲品，認為客人熱烈捧場並非食物本身，「佢哋想食個意思」。
Glory續指早前大推「何已完飯」，賣足一星期也大排長龍，今次推出「武警飯」，形容也是在值得喜慶時與民同樂，承認今日街頭抗爭稍有冷卻，故自去年11月大勝後，市民很久沒聽過開心事，「警員suppose係一個崇高職業，但7.21、8.31、10月1數唔盡嘅日子，你哋問下自己做過咩。你（藍絲）唔話佢哋冷血？」。他承諾往後會繼續在適時推出優惠，舉例坊間盛傳的「林鄭3月下台」，或是立法會選舉結果出爐，明言重點不在於「我哋贏而慶祝，係佢哋輸」。
市民心情今非昔比，17年前面臨沙士重創香港，有前線醫護患病殉職，令港人同哀。今日社會反映普天同慶，學生Katy直言是應有此報，「得唔到應有制裁，個天就出手」。友人Ada補充「就咁等（染）病過身唔夠，最好有後遺症，個肺有事、要用呼吸機」。市民Kenny直言「開香檳」只是一個形式，當日「你點對人，人哋點對返你」，指去年11月將軍澳警民衝突間，市民周梓樂墮斃，有警員竟指要「開香檳慶祝」，是令人神共憤。他補充「會有幾人中我唔講啦，大家心裏有數，我唔知佢哋仲算唔算『人』」，他又相信「報應會直到永遠」。
浸會大學新聞系高級講師呂秉權表示，過去17年間特區政府的體制及警隊公信力的改變，導致市民對於是次有公職人員確診武漢肺炎出現完全不同的觀感，「17年前就算幾唔鍾意董建華政府，都未至於係覺得禮崩樂壞，嗰陣頂多覺得佢好心做壞事、後知後覺，亦唔係事事以一國優先」。他指是次港府處理疫情的表現，已令市民覺得「破咗產」，「考慮以大陸優先多於香港人切身利益，香港人會覺得成個制度已經淪陷咗」。
至於警隊的情緒，呂直指與2003年不可同日而語，「當年警察未至於同市民為敵，喺防疫方面都表現得好專業，嗰時喺做檢疫工作嘅隔離營，佢哋都好奮身同第一時間去做，都係全民抗疫嘅一個中堅」，到了今天，他指警隊予市民觀感是「貪生怕死、貪資源」、亦沒有成為防疫工作的中堅，甚至在全民抗疫期間仍舊聚餐，「飯局唔戴口罩、口沬橫飛、有啲人又唔用公筷」，指港警於防疫期望作出種種不理會觀感的事情，「令到人好失望，仲要好似大條道理咁，如果特區政府破產，咁警察嘅表現就係負資產。」
臨床心理學家葉劍青分析指，社會整體的「反警現象」，早在抗爭前期已植根，舉出去年8月尾中大民調，市民對示威者破壞公物的反感程度，比傷害警員更高。區議會選舉後，武漢肺炎攻陷香港，外出也成問題，心靈長期處於壓抑，加上疫情間警員繼續被揭濫用防疫裝備等負面新聞，「亦無再做任何正面嘅PR（公關工作），連山竹時解放軍清理都唔識做」，令今次疫情終牽連警員時，引發市民的亢奮，又指除非有獨立調查委員會等的制度改變，否則市民對警仇恨，將沒完沒了。
-----------------------------
【未敢忘記】03年沙士重溫
立即按此
-----------------------------
無懼警暴 學懂自救
《抗暴之戰●法例須知》讀果上架
-----------------------------
《果GYM》隨身播 健身壹App過！
一按即玩
來源 source: http://hk.entertainment.appledaily.com