「鐘錶界美女」胡敏珊前年透過相士改名胡曦文，「曦」字有「晨曦」的意思，她希望每天都活在陽光中。
2007年，胡曦文失去了最愛的媽咪，其母由寓所的27樓墮下死亡，這件事後，她甚少提及媽咪。胡曦文在單親家庭長大，胡媽媽母兼父職湊大三姊弟，她與母親一直同居，感情要好，但媽咪沒有留下一句話便離開，對胡曦文三姊弟打擊甚大。為了忘記喪親傷痛，胡曦文在母親死後兩年，不停工作麻醉自己，用忙碌去填滿空虛，最後生意失敗，事業和家庭雙失，她崩潰了，也收埋自己。
近年胡曦文重返社交圈，也重新建立自己品牌，她整個人如脫胎換骨，重現開朗。胡曦文日前接受《蘋果》專訪，她不介意提到亡母的事，「媽咪當日走咗，我唔係即刻有事，我不停工作麻醉自己。不過，一睇親電視見到有我媽咪類似意外，我個心會彈咗出嚟。過去好多年有去睇醫生，用好多時間搵位同人分享，足足8年先走出黑暗期。媽咪事件，令我冇晒信心，嗰時忙做嘢，以為自己冇嘢，原來裏邊有啲嘢傷害咗自己唔知。我喺單親家庭長大，父母喺我6歲時分開，我同媽咪好好感情，每朝大家會錫錫先出門，意外嗰朝早都有咁做，我朝早趕時間化妝出門口，媽咪會走嚟餵我食嘢，由細到大都係咁，一個咁愛自己嘅人走咗，點會唔傷心，裏面心靈碎片要好耐先拼番埋。」
「人人都會遇到生離死別，你問我，我當然唔想上呢一課，點樣將負面變正面？媽咪單親，咁多年佢做埋爸爸要做嘅嘢，佢心中有少少唔開心，但冇同我哋講。媽咪過身，我學到點樣去愛自己多啲，唔好成日give，畀人太多，要平衡番。有錢成功唔代表係快樂，唔係搵好多個『億』先叫快樂。」
喪母後兩、三年間，胡曦文遭逢公司結業，事業陷低潮，她索性出走到印度和尼泊爾靈修月餘，旅程中突然「開竅」。「印度通街好多人好窮，冇一個地方唔污糟，我已幸運有車、有司機、有導遊，我去嘅地方唔奢華，沿途不停有人乞錢，我問自己點解佢哋笑得靚過我，我對比呢班窮人，我人生機會同擁有嘅嘢，佢哋一千分一都冇。香港人呻劏房好辛苦，但我印度個司機同我講佢喺車裏面瞓，一年先見親人一次，我聽完就同自己講，唔可再怨個天，我失敗有幾大，我永遠唔會再去投訴，有印度媽咪每日湊住細路喺馬路上行乞，我冇受過呢啲痛苦。媽咪過身，事業低潮，我試過辛苦到透唔到氣，靈修之旅，我學會人生最快樂一樣嘢就係感恩，快樂唔係睇外面，係睇裏面，外面嘅嘢永無止境，我搵一億唔夠，想搵200億，買咗架Toyota，又想要架跑車，物質啲快樂好短。快樂要珍惜，開心同你有幾多無關，當你滿足就開心，人生係自己畫嘅畫，自己朝早望住塊鏡，你想人哋點對你，你咪望住塊鏡點囉。」
當日有誰陪胡曦文走出谷底？她身邊雖有雪中送炭的朋友，不過錦上添花比較多：「我同時感恩開解過、冇開解或者甚至攻擊過我嘅人，佢哋都對我有極大影響，呢啲爆炸力令我諗通同醒咗。媽咪死時我冇喊過，我自細就好堅強，媽咪話生完我，隔籬屋都唔知，因為我從來唔喊。反而密宗寧波車同我講，要我燒晒媽咪同我啲相，我就大喊咗出嚟，喊到癲咗，人唔喺度，你仲要我燒晒啲相，寧波車話道理係要我放下，希望我媽咪都放下，畀佢去更好世界，一張都唔留得低，用智慧去愛媽咪。我諗咗一晚點去用智慧，我要去做佢鍾意嘅嘢，我唔相信佢想自己個女喊，亦唔相信佢想我頹廢，我要令自己有正面思想，活得更好。」
現在即使面對逆境，胡曦文都會化負為正，她說：「我學識將自己喺件事中抽離出去，負面就係正面嘅動力同催化劑，令自己變得更堅強，呢個係我喺人生低谷學番嚟，你好富裕係學唔到呢啲嘢，人真係要捱過，經過磨練先會成功，唔好怕失敗，如果我失敗唔醒就唔識企番起身。」
撰文：比華利
攝影：沈健程
攝錄：廖達燊
場地：FAM囍公館
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com