全球多個股市高位下跌近兩成，市場開始討論熊市是否悄然來臨，經濟學者羅家聰指出，股市形態不似熊市，經濟基本面不太差，他認為是「人為跌市」居多，「之後或一直升到美國大選」。
羅家聰表示，一般熊市的定義是高位下調兩成，不過根據杜氏理論（Dow Theory）講法，要呈現一浪低於一浪的格局才算是熊市，現時形態上未必似，今次是忽然大跌，究竟會出現1987年絕地翻生，抑或典型熊市般續跌，仍是未知之數。
再參考基本因素，他續指目前先進經濟體的經濟大部份無異樣，加上孳息曲線未出現逆向，「如果係經濟衰退，閒閒哋都逆向半厘，維持至少4至5個月」，現時其他領先指標包括樓市及就業數據全部理想，「宏觀經濟唔似有衰退，按歷史經驗，一般只係調整，而唔係熊市，（跌）兩成應該搞掂，有機會差不多夠數」。
市場最憂慮出現「供應樽頸」，羅家聰提到，此憂慮或被誇大，供應沒有大規模受影響，實際情況似是「人為跌市」居多，「如果借瘟疫做落嚟，大行跟住唱，油市又係嗰幾間大行玩晒，同總統夾計一齊做低個市，之後係咁升，升到選舉，呢個猜測雖然好陰謀論，但有合理懷疑」。
羅家聰解釋，倘下跌由散戶帶動，難在一、兩個交易日下調一至兩成，「睇返上星期，大概4棍左右，就跌咗正常調整四星期嘅幅度」，質疑是大行程式盤驅動。他續認為道指在24,000點有較大支持，若市場再現恐慌情緒，指數或有機會再下跌，「出現第二、三個支持位或需時兩三個月，但我真係唔識測每次跌幾深，恐慌起上嚟真係無譜」，如現時撈貨或會捱價，宜分三注入市，短炒則要留意切忌留貨過夜。
恒指方面，他認為走勢未必跟足美股，指恒指較早前已開展跌浪，今次跟美股一同下跌，但跌勢相對慢。他反指，香港接近疫情重災區，股市表現有機會類近沙士時期，或會較美股遲半年見底，短期來說，港股已跌至首個支持位，但或會進一步下試22,000點至23,000點。
資金由股市湧入債市，孳息曲線趨平，「特朗普早前已大打開口牌，市場又真係有反應，背後可能真係有人做嘢，所以利率期貨諸如此類唔再係反映大部份人嘅睇法，只係反映盤路較大嘅人嘅睇法，聯儲局都畀政治、市場騎劫，我相信你叫佢減幾多，佢就減幾多」。
記者：黃珮琳
-----------------------------
【武漢肺炎】專頁
全民自救 抗疫資訊盡在《蘋果》
-----------------------
屬於香港人的移民攻略
立即登入【全球樓行】
Dream House零距離
來源 source: http://hk.entertainment.appledaily.com