郭富城的媽媽於今年2月離世，城城忍着傷痛送別，但生活還是要繼續，日前城城帶住太太方媛和2歲半的「大寶」Chantelle一齊去超級市場，在疫情下盡情掃貨，而「二寶」Charlotte則未有同行。
當日傍晚近6時，全身黑衫黑褲的城城揸住波子Jeep駛到陽明山莊超級市場，雖然超市有專用停車場，但城城疑貪方便，只將車輛停泊在雙黃線，近超市門口位置。城城是天王級，雖然只是去超市這等平民地方，但仍好注重儀容，落車時見他gel行髮型，隨即戴上口罩，耐心等待太太方媛抱實囡囡落車。
城城一家防疫意識好高，囡囡大寶一入超市已經「扭計仔」，城城惟有安排囡囡坐上購物車，但亦好體貼先用自備的消毒酒精噴勻車身，讓囡囡坐得安心。方媛穿上紅色運動裝，好sharp醒，囡囡亦特別黐媽咪，經常扭抱，又要買好多零食；城城則「廚男」上身，負責揀餸菜，買肉、買瓜、買菜全部一腳踢。一家三口在市場逗留約半小時，城城便排隊畀錢離開。
54歲的郭富城於2017年與內地網紅方媛結婚，工作以外，全部時間都放在家庭方面。去年9月逆權運動期間，城城便被傳媒影到駕駛着黑色林寶堅尼到銅鑼灣買尿片給囡囡，真是個超級顧家的好男人！
此外，熊黛林老公郭可頌日前亦去渣甸山超市極速買了一包粟米，連埋排隊畀錢，約2分鐘便揸車離開。
採訪、攝影：徐錦池、孔子
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com