武漢肺炎肆虐，香港出現「盲搶炎」荒謬現象，搶廁紙、搶米、搶M巾，創意無限的高登仔，將劉雅麗金曲《你為了愛情》二創，改為《你你你為了肺炎 今天不冷靜》，歌詞「高汁」抵死，網民勁讚：「笑死街坊」、「填詞超級正」、「點解咁高質」，召喚原唱真人演繹，劉雅麗爽快答應《蘋果》邀約，滿足網民要求。
因為多間卡拉OK停止營業，記者只能借到餐廳做訪問，在零音響器材提供下，唱家班的劉雅麗幾乎是清唱，自謙未開聲的她，試唱了兩次，最初被歌詞引到邊唱邊笑：「唔識唱呢啲歌，我真係第一次，我諗住咁hit，咁多friend徇眾要求，我平時好少做呢啲咁搞笑嘅嘢，咪試吓啦。」當唱到「來貨佢話再加價」這句，因歌詞甩咳又唔啱音，劉雅麗失笑：「呢句真係有啲撠。」最後，當然難不倒劉雅麗，第三take已完美演繹這首二創歌。
雖然高登仔是業餘二創，劉雅麗讚歌詞到肉：「不過都係苦中作樂，大家聽落覺得好好笑，其實我覺得好可悲，如果香港人搞成咁，要通宵排隊買口罩，朋友又唔見得，其實係慘！點解香港人要咁樣喺超市度連M巾都搶，乜嘢事？可樂又搶，米又搶，我覺得upset係因為自私，其實你諗住搞掂自己就得，但有冇諗過真係有人買唔到，呢樣嘢係好唔開心，原來大家唔愛香港，點解要咁樣盲搶。」除了「盲搶炎」，香港還有人打劫廁紙，令劉雅麗啼笑皆非：「好笑囉，好似好舊嘅喜劇電影嘅低級趣味橋段，哈哈哈，點會咁㗎，千幾蚊廁紙搶嚟做乜，米、口罩、搓手液我都明，廁紙搶嚟做乜，點解香港搞成咁。」
自己夠唔夠口罩用？她說：「過年前喺便利店買咗十個，初二我去咗美國做嘢，朋友通知我話香港乜都冇晒啦，口罩、搓手液，我話得啦，我喺美國幫你掃返嚟，點知行咗好多間藥房，真係一罩難求。」買唔到口罩是否好徬徨？「我諗我份人算幾好，因為好多朋友對我好，我喺fb寫喺美國買唔到口罩，有朋友喺日本做嘢，寄咗好多盒畀我，返到香港，又有朋友即刻車一盒畀我，咁啱14號情人節再去美國做騷，我唔係收花，係狂收口罩，屋企而家好多口罩，周圍問朋友唔夠過嚟搵我。其實我出街會帶多個，如果見到長者冇口罩會送畀人。」
不過，由於疫情肆虐，劉雅麗多留家中做宅女：「真係好少出街，所以一個口罩可能用兩日至三日，有時出去一、兩個鐘食嘢，因為我唔係搭港鐵，係揸車，條街又冇人。我覺得戴口罩係道德問題，你自己唔驚啫，人哋會驚你，戴咗大家安心啲，但我唔係驚到咁緊要，我搭飛機都冇戴口罩。因為我上機前睇咗篇文章，《加拿大日報》訪問航空公司醫生，佢話喺飛機其實戴太耐口罩反而唔好，因為你講嘢、呼吸有好多水份，焗得太耐會滋生病菌，同埋佢話飛機空氣系統好似手術室，一直循環過濾，所以唔使咁驚，反而佢覺得最重要都係洗手，唔好同人接觸，緊要過戴口罩，所以我上機用消毒紙巾抹乾淨晒椅背、電視機、安全帶，自己覺得要中就中，十幾個鐘頭機冇理由唔飲水唔食嘢。」
市民為避炎減少出街消費，好多食肆、公司倒閉，好多人失業，娛樂圈更幾陷停頓，電影和演唱會全部叫停，劉雅麗的工作都大受影響：「由社會運動到而家，我喺香港冇乜嘢做過，我諗收入少咗一半，之前有唱歌騷因為社會運動取消，而家呢個疫情，嚟緊兩個月都唔會有乜嘢做，其實係好辛苦。慳啲使囉，死頂囉，女人好容易，少shopping已經慳好多錢。嚟緊諗住6月30日同媽咪搞個演唱會，因為媽咪今年73歲，佢好想開演唱會，我覺得同佢一齊開好有意思，我唔想再等多一年，祝願香港冇事。」
去年實施《禁蒙面法》首日，各區抗爭遍地開花，劉雅麗曾在尖沙嘴義載少女返家，鬧爆的士佬坐地起價：「嗰件事其實upset嘅，坦白我係冇顏色，大家愛香港唔應該分化，政見唔同，可以有言論自由，嗰晚係立《禁蒙面法》，朋友喺尖沙嘴食完晚飯，突然乜嘢交通工具都冇晒，佢住藍田，的士佬話要加300（元）先去，我車佢返去。On the way喺藍田返尖沙嘴嘅時候，我見到一個好瘦削全黑衫女仔，我紅綠燈停低，見佢截的士唔肯載，我好嬲的士司機點解拒載，我叫佢上車，我唔理佢係咪示威者，只係見到好多人冇車搭返唔到屋企，點解要坐地起價？大家香港人點解唔幫大家？你行多幾轉錢咪喺度。我好心痛，點解香港人唔幫番香港人。」
隨着時代的巨輪轉變，現今藝人是否應該貼地關心社會？劉雅麗認為：「藝人因為有影響力，講嘢會多啲人睇到，我哋賺咗咁多名氣、金錢，我覺得要做番榜樣。」
《你你你為了肺炎 今天不冷靜》
你你你為了肺炎 今天不冷靜
你你你為了肺炎 通宵走去逼
你你你為了肺炎 周街搵口罩
來貨佢話再加價 只有乖乖畀多兩嚿
你你你為了肺炎 今天不冷靜
你你你為了肺炎 通宵走去逼
你你你為了肺炎 周街搵口罩
來貨佢話再加價 只有乖乖畀多兩嚿
紙巾等補貨 M巾都清貨
誰又決策太無料變這惡果
酒精搓搓手 不敢搵好友
同事個個問嘢相隔三呎 安心仍未夠
紙巾等補貨 M巾都清貨
誰又決策太無料變這惡果
酒精搓搓手 不敢搵好友
同事個個問嘢相隔三呎 安心仍未夠
撰文：余燕儀
攝影：陳俊強
攝錄：廖達燊
場地：Harlan's (The ONE)
來源 source: http://hk.entertainment.appledaily.com