誰不怕下地獄？你怕，我也怕。
養尊處優的富商、人稱「劉公子」的劉定成2012年因一項非禮罪及兩項刑事恐嚇罪成，被判囚17個月，當中涉及非禮恐嚇男藝人，轟動娛樂圈，住跑地豪宅的劉定成淪為階下囚，被關在赤柱僅70呎獨立囚室，那段日子刻骨銘心，成為他的人生轉捩點，「裏頭嘅日子苦不堪言，收押人生，簡直係落咗地獄。我由天堂跌咗落地獄，地獄之下仲有深淵。」
當年62歲的劉公子食慣嘆慣，出入有助手、工人相伴，初嘗鐵窗滋味，劉公子服刑4個多月後向高等法院申請保釋上訴，最終上訴失敗，劉公子再收監繼續餘下刑期，2014年才刑滿出獄。
經典電影《監獄風雲》大爆監躉生涯，但原來鏡頭下跟真實情況有大段距離，釋囚劉公子親述感受，「舊式監獄入到去好暗，《監獄風雲》啲監房畫面已經係美化咗，隔籬啲人同我講廁所有老鼠捐出嚟，我要搵嘢冚住個廁所，唔畀佢有嘢捐出嚟，又有曱甴昆蟲，我朝早聽到烏鴉叫好驚，又瞓唔到。」報道雖指劉公子獲安排關進獨立囚室，但他剛入冊時難逃獄中「新丁」要被玩一劫，「有一日，佢哋話『新人』喎，新人要去嘗試吓嗰啲味，我就俾佢掟入地獄谷底，《監獄風雲》場面好過我十倍，我瞓喺床度成條雪條咁，我怕張床會塌唔敢郁，因為一塌跌落地，容乜易見到死老鼠，監房塵土飛揚，睇見都想嘔。我頂咗一晚就搲到轉上J Block，即係獨立囚室，可以單獨放風一小時，唔係怕你俾人打，係佢唔想你同其他人接觸。」
踎監這個打擊令劉公子暴瘦，情緒低落，他在赤柱服刑時被安排見心理醫生，醫生用披頭四（The Beatles）的經典金曲《Hey Jude》中一句歌詞鼓勵劉公子重新振作，「嗰句就係『Take a sad song and make it better』，我聽完佢講動容，喊咗出嚟，呢句話令我恍然大悟，立即開竅。睇完心理醫生後，我行返去自己嗰個70呎囚室，茅塞頓開，我自己抹地、執床鋪、抹廁所。好多嘢冇得驚，廁所都係得我自己用，點污糟都冇人入嚟屙，做得第一次，第二次就唔會嘔心。嗰次之後，我就好積極，同自己講一定要硬淨捱過。」劉公子如是者咬實牙關，2014年3月8日出冊重生。
劉公子深切體驗獄中生涯，當他聽到抗爭手足被濫捕後關進新屋嶺，手足們出來後大吐苦水，劉公子說：「新屋嶺唔係人住嘅地方，我未去過，裏頭有幾恐怖，我睇新聞描述出嚟，我聽還柙手足講喺裏邊俾人非禮、強姦、雞姦，聽見已毛管戙，係咪真我唔敢講，乜都要fact check。」劉公子因為曾被關進荔枝角收柙所，今年1月農曆新年前，他有響應立法會議員發起「手足，和你團年」集會，到在荔枝角收押所外聲援被囚人士。
撰文：陳杰
攝影：郭賢興
攝錄：廖達燊、馮嘉銘
場地：火鍋頭
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com