新加玻政府上周五宣佈，總統、全體內閣部長同政務官減薪一個月，與民眾共渡時艱後，777班子隨即「跟風」做騷，宣佈問責班子捐出一個月人工，民建聯、工聯會立法會議員其後亦唔執輸，話會捐出347萬幫助基層抗疫。
曾任林鄭競選辦顧問嘅「107動力」召集人何民傑今日喺《城巿論壇》，藉機問在席議員會唔會仿效？民主派黃大仙區議員譚香文話會將預算案派發嘅一萬蚊捐出嚟買口罩畀醫護人員同居民，佢話區議員嘅人工其實好少，但唔介意捐一個月人工出嚟。
民主黨立法會議員尹兆堅就覺得，政府高官同民建聯嘅做法好好笑，講到捐一個月人工好似好巴閉，「佢哋對香港造成嘅損害，係大大高過佢哋嘅一個月人工」尹自稱雖然好窮，但早前已自資10幾萬元買抗疫物資幫助巿民，但無刻意公佈，「有乜好講啊？呢啲應該做㗎嘛」，批評建制派捐嗰少少錢就大鑼大鼓，無非想「漂白」自己。
本身係服裝品牌G2000老闆嘅田北辰亦稱林鄭班子未捐人工前，佢一早捐咗3萬幾個口罩畀社區協會，3萬幾個口罩畀醫學會，另有10萬口罩捐咗畀不同基層群體，涉款達5個月立法會議員人工，「呢啲我做嘅時候呢，呢班人完全未開聲」；而由於幼稚園停課，佢加印咗2萬本英文故仔書同電子點讀筆派畀巿民，嗰度涉款係佢6年嘅立法會人工，「我用咗6年零5個月嘅人工，我係冇出過聲嘅，你（何民傑）今日問我？咁我就講囉」。
以立法會議員月薪9.3萬計，田二少6年零5個月議員人工約為716萬，相對問責班子只捐一個月薪酬合共約600萬……嗯，唔知何民傑有冇後悔問咗呢個問題呢？
-----------------------------
【未敢忘記】03年沙士重溫
讀果上架
-----------------------------
《果GYM》隨身播 健身壹App過！
來源 source: http://hk.entertainment.appledaily.com