【李八方online】笑她太瘋癲?元秋出「A片」再推蒸口罩 防護中心Hashtag寸:用完即棄 #元秋 #蔣麗芸

【新增內容】武漢肺炎疫情令到撲口罩成為全港市民的日常生活一部份,有商界成立生產線,自己口罩自己造,有政黨則撲口罩撲到地球另一端,相信唔少人面對過落單、 ...






【新增內容】

武漢肺炎疫情令到撲口罩成為全港市民的日常生活一部份,有商界成立生產線,自己口罩自己造,有政黨則撲口罩撲到地球另一端,相信唔少人面對過落單、被cut單、再落單再被cut單嘅慘痛經歷,但種種堅持呢,都唔夠外號元秋嘅民建聯立法會議員蔣麗芸咁「堅」,就算面對世人笑佢太瘋癲,佢都只慨嘆他人看不穿,堅持教大家蒸口罩。

元秋今日喺fb出po,拍片「A姐話你知」為自己大平反,八方先旨聲明,呢條「A片」真正重口味,佢除咗引述台灣中山醫學大學生物醫學科學系教授賴全裕嘅研究結果,甚至委託香港標準及檢定中心檢測,拎出報告話蒸過嘅口罩,證明高溫蒸口罩10分鐘之後,唔單止無破壞口罩結構,口罩平均過濾能力只係下跌0.11%,力證若果要重用口罩,高溫消毒係可行方法。

元秋用科學嘗試說服公眾,不過網民就唔多受,有網民留言叫元秋不如自己蒸蒸個腦先,又話好多長者會相信,希望元秋畀返少少責任感。但都有人認真討論,話查實蒸口罩可唔可行,都要睇很多因素,包括測試嘅口罩品,又質疑過濾力就算只是少少損害,但外層防水、內層吸水能力都要注意。

呢個po再次引來激烈討論,但元秋成段短片其實最啱聽都係最後20秒,就係勤洗手、注意個人衞生,減少聚會更加好。

台疫情中心表質疑

八方為廣大市民健康着想,馬上fact check,發現台灣專家對賴全裕「蒸」口罩嘅「研究」都充滿疑問,亞東紀念醫院感染管制中心主任廖俊星指,以紫外線消毒、水蒸口罩、酒精消毒等,都無研究證實能有效消毒口罩,水蒸、酒精消毒甚至可能破壞口罩結構。

台灣中央流行疫情指揮中心則指,坊間好多關於口罩蒸熱、消毒後可重用嘅說法,但都係有違一般對於口罩防護性嘅學理同常識,全部有待證實,叫大家唔好輕信。

衞生防護中心再反擊 Hashtag寸爆「用完即棄」

其實元秋上次推介蒸口罩後,衞生防護中心已經出po反擊話唔work,今日元秋繼續sell(蒸口罩),衞生防護中心又再「出po有名」,製圖話畀大家聽「外科口罩消毒完可重用?絕對唔係!」強調所有外科口罩都係即棄式,用完除低就要掉,總之用過嘅口罩,表面已經沾染病菌,濕咗嘅口罩會影響效用。

八方覺得最亮眼嘅反而係Hashtag,「老是常出現」、「舊po再出」,擺明寸爆元秋錯完再錯,而其後嘅「用完即棄」,更加有雙重意味,皆因嚟緊9月嘅立法會選舉,九西建制票唔夠分,元秋都要讓路畀舜仔……應該唔係講呢單啩?「建議考慮少啲講啲冇乜用嘅說話」,直線抽擊KO元秋。

不過,衞生署今午的疫情簡佈會中,衞生署衞生防護中心傳染病處主任張竹君亦被問到蒸口罩是否真的可以重用口罩,張指自己不是專家,不知蒸口罩是否可以消毒,要等專家去檢視。

-----------------------------

【未敢忘記】03年沙士重溫

讀果上架

-----------------------------

《果GYM》隨身播  健身壹App過!

蔣麗芸議員fb影片截圖/衞生防護中心圖片


蔣麗芸稱委託香港標準及檢定中心檢測,顯示高溫蒸口罩10分鐘之後,口罩平均過濾能力只係下跌0.11%。


衞生防護中心圖片