立法會在武漢肺炎爆發後首次舉行會議，由議員質詢政府抗疫表現，政務司司長張建宗率領11位局長到場迎戰。金融服務界議員張華峰質詢有關上市公司的匯報問題，月薪30幾萬的財經事務及庫務局局長劉怡翔則以口罩供應回應，魂遊太虛、答非所問，被其他議員批評「發夢」。他其後才正確回應，指港交所會酌情協助有困難的公司。
金融服務界議員張華峰問及，政府會否責成港交所考慮，將涉及內地公司或在內地有業務的上市公司延遲公佈年報，以免出現不必要的恐慌性拋售？張建宗著財經事務及庫務局局長劉怡翔回答，原本會上十指緊扣、無所事事的劉被點佢要求回應時，先是神色慌張四圍望，再揭開面前文件讀稿，九唔搭八指：「口罩供應情況其實係物流署方面……」
立法會主席梁君彥即打斷劉怡翔發言，提醒他張華峰的提問是有關上市公司情況；劉怡翔最後要請張華峰重複：「可唔可以請議員重複問題，頭先我……」張華峰罕有激動回應：「我嘅問題已經問咗啦，我叫政府責成交易所將年報延期嘛！」
張華峰會後接受《蘋果》查詢時對劉怡翔答非所問顯示理解：「佢（劉）係集中精神，想回答啲戴口罩嘅問題，即係太過……即係呢個集中精神，去回應有關口罩嘅問題」。他稱沒有嬲劉怡翔，相信劉要處理不少問題，「可能佢諗緊第二啲嘢，呢啲嘢都唔係太過奇怪」。
民主黨立法會議員林卓廷則怒斥劉怡翔「魂遊太虛」，指今次是政府官員在武肺爆發後首次接受議員質詢，「（劉）居然（每月）𢭃30幾萬人工喺度發夢？」林形容是「世紀級公關災難」，「如果係民選政府，呢啲官員落咗台嘞」，斥劉作為問責官員連基本行政官員的能力也欠奉。
公民黨郭家麒亦對劉表現「嘆為觀止」：「其實呢個咪正正現時特區政府嘅表現囉！無論係劉翔怡同其他官員都係攞緊幾十萬人工，繼續喺度發夢、無幫到香港人，如果呢班官員繼續用呢一種態度，其實香港係岌岌可危」。
劉怡翔在會後被問到為何席間未有聽到議員問題時曾拒絕停步作答，只說：「我做緊嘢」，及後在大批傳媒追訪下，其新聞秘書上前為劉補鑊說：「我哋有講（原因）㗎、有講（原因）㗎！」。劉怡翔聞言後方停步說：「我係處理緊一啲問題，嗰個時候我啱啱睇緊啲口罩嘅問題」；問到會上是否「發緊夢」時他則說：「當然唔係啦」，至於有何公事較聽取議員提問更重要時，他說：「因為當時有啲緊急嘅公事，關於口罩嘅事情，所以我喺度處理緊」，之後就快步離開，未有親口就會上「失魂」問題致歉。
劉怡翔其後亦通過新聞秘書就未有專注會議致歉：「局長當時因太專注以手機處理公務，非常抱歉沒有留心議員的提問，以後必定會多加注意。」
記者 林俊謙、鄧力行
-----------------------------
【未敢忘記】03年沙士重溫
讀果上架
-----------------------------
《果GYM》隨身播 健身壹App過！
來源 source: http://hk.entertainment.appledaily.com