上帝用7日創造世界，80後港人唐先生就花了14日開設港產口罩生產線。他是電影人，與幾位電影業朋友花私己錢投資港產口罩，搶物料搶機械，投資額由200萬元升至逾500萬元，過程膽戰心驚，最終擦一額汗，以「口罩工廠Mask Factory」之名創立港產口罩。
《蘋果》記者本周直擊工廠，見證一個港產口罩的誕生，3種布疊壓切，唔使一秒生產一個。他坦言，「等得政府嚟，我自己都生產咗」，日前工場有一條生產線，初步預計日產量逾7萬個口罩，口罩最平一個賣一元，首批口罩將送贈醫護、長者、清潔工等等。
「等得政府嚟，我自己都生產咗」
記者日前直擊位於屯門「口罩工廠」生產線，佔地約7,000方呎，前身是食品加工場。廠房大致設兩個關卡，甫入廠房穿鞋套，然後入面有一間約2,500方呎的無塵工作間。進入無塵工作間需要穿上防靜電服、眼罩、頭套及耳套，其中耳套是減輕生產過程的超聲波對耳朵造成的影響。生產線有兩名技術員操作，啟動後，3種無紡布，包括外層防水、中層過灑、內層吸水，疊起後再連夾實鼻位鐵線，經超聲波焊接後，切割成型，最後上耳線。最快不用一秒就完成一個口罩，不過暫時試產階段，直擊時機械曾經卡機一次。若操作順利，每分鐘可生產80至100個口罩，暫時保守估計日產量逾7萬，計劃日後24小時運作，日產量可望超過10萬個口罩。
看似幾個簡單工序，其實唐先生由零開始。早前接受本報訪問講到自己從世界各地以高幾倍價錢搶料、搶機，由農曆年初十（2月3日）開始部署，及後落手行動訂購口罩機及原料，到2月16日生產線試行投產，兩周時間過程披荊斬棘。
唐先指，2月6日從印度以高近5倍價錢搶購生產機，「原先標價數十萬元，最終以超過100萬元購入。」同一時間亦開始搵口罩材料，以及物色工廠廠房生產。
口罩機原定2月12日直飛香港，卻錯過原定航班，「好大壓力，嗰幾晚都無瞓到覺！」、「我日日都諗緊嗰幾十萬（訂金）會唔會畀人呃咗！」延遲雖然是一天，但唐先生感覺像千年，「好啦唔直航，變轉機，一直睇住班機，落地再轉機嗰下又delay，因為我哋件貨太大，要轉去第二部飛機，睇到成功上機唯一最驚，頂你個肺，會唔會空難呢？」
「資金無政黨 全部係電影人嘅私己錢」
生產機械2月13日到香港，翌日口罩原材料亦到埗。唐生於2月12日千辛萬苦搵到無塵工作間，業主還支持到未收按金已交場，但發現工廠升降機載不到機械入廠房，於是花錢聘用吊機，把它由外吊入內，當時他想到原來廠房都十幾層樓高，「吊車大佬好支持我哋，換咗部最勁嘅吊車，確保安全，拍晒心口：『我吊緊幾百噸都係咁吊呀，唔使驚！』」
好人一生平安，萬事俱備只欠員工，在網上發文招聘，負責請人的廠長胡先生成為網民瘋狂追尋人物，又被網民質疑他們的背景及資金來源。其後又因廠長兒子把廠房相片流出，一度誤傳是港視（1137）創辦人王維基訂購的機械已運抵香港。唐生澄清：「我哋工聯會？一定唔係其實我哋嘅資金上次點解未講到呢，因為成件事都未成功。點解唔想講，因為唔想將電影同口罩呢兩樣嘢掛鈎，有啲譁眾取寵，啫係『電影人走嚟搞口罩』。係未搞到呢件事前，我哋唔敢講，因為做唔到都幾無面。我哋想完成咗，做好晒，先話畀人聽。」他補充：「我哋資金無政黨，所有嘅機構、團體都無，全部都係我哋電影人嘅私己錢。」
「口罩工廠」日產逾7萬個口罩 「唔係發國難財」
他補充，計及口罩機約120萬元，口罩其他原材源亦斥資150萬元，連同租金及人工開支等，估計投資額超過500萬元。
唐生預期，口罩定價最平1個1元，另外還有兩款選用阻隔力更強、成本較高的口罩，暫時定價分別每個分別為1.5元及2元，將會透過網上銷售。每個賣一元是否蝕住做？唐先生坦言：「每個賣一蚊呢，物料錢我哋返到嚟，但如果包埋租金、營運可能有機會蝕。但如果賣到每個1.5元，就有機會賺到。」
一罩難求，製造口罩是否發國難財，他直言：「我哋唔係發國難財，成個計劃一早就係會將第一批貨捐出去」，捐贈對象是目前最有需要人士，包括醫護人員、長者及清潔工，將會成立義工團派發。目前物料預計可以生產最多1,500萬個口罩，他已委聘檢測公司為其生產口罩進行驗證，最快14至20天內獲得報告。口罩通過檢測後，預期3月初正式發售。
記者:陳家雄
影片
採訪：陳家雄、張嘉鎣
編撰、旁白：張嘉鎣
攝影：Gary
剪接、後期：張嘉富
編審：倪敏慧
來源 source: http://hk.entertainment.appledaily.com