本身坐擁7間舖的蘇志威，分別是3間西裝店和4間跳舞學校，《蘋果》收到讀者爆料，指蘇志威位於美孚「iDance」分店，已於昨日關門大吉，並聲稱有4名員工被炒卻沒賠償，記者走訪美孚分店，發現門外貼告示指大廈進行為期9個月消防設備更新，沒水供應，故今日起停止營業。
對於被指摘是無良老闆，蘇志威接受《蘋果》電話訪問反擊：「我公司有百幾人，閂咗一個center，有幾個員工我唔要，係一個好正常商業行為，況且有1個未過試用期，覺得佢做得唔好，唔要係好正常，點解有人覺得咁大件事？其他3個係導師，我炒人一定有原因，正常運作之下，就算你同公司賺唔到錢，你做得唔好，我繼續養住你；但當遇到呢個時勢，公司要頂住過關難，你仍然做得唔好，畀咗10年機會你，仍然都係咁表現，公司炒你係道理，我留你係人情。」
對於被質疑炒人冇賠償，蘇志威勞氣說：「黐線，係咪儍儍哋，賠足晒，幾乎賠凸添，有啲導師因為唔係香港人，MPF喺佢走之前畀唔到錢佢，公司畀埋佢先，跟住先同MPF對，做到足晒。」他再三強調因員工表現差才解僱：「你問一問爆料人，佢平均收入帶嚟嘅客，呢十年佢排第幾？炒咗嘅人，佢喺公司請嘅病假係咪no.1？」除被炒員工不滿外，對於有學員爆料替導師抱不平，指導師要「跑數」，蘇志威說：「學生跟佢跳舞等於追星心理，一定覺得佢最好。每間公司有唔同做嘢方法，譬如我公司有兩個制度，一個私佣一個公佣，入嚟做就要跟公司規矩，唔好干涉我公司運作。」
發生今次事件，蘇志威坦言唔開心：「我對啲員工咁好，如果佢有付出，係唔會郁佢，呢10年公司蝕錢都養佢，我咁大條數，蝕佢一個有乜所謂。但呢個冰封時期，佢都係咁嘅表現，呢個疫情搞到生意好淡薄，我都受影響，頂住咋，捱，每個月都蝕，呢個時候我唔要一個令公司蝕錢嘅人，我覺得冇問題喎。但我又唔會嬲其他人點睇，我做番自己嘢，問心無愧就得。」
問到有冇信心將來再開？他說：「唔知，要睇時勢，如果疫情穩定番，租金去番低水平，可能再開過。」其他分校和西裝店生意有冇受影響？他坦言：「中環嗰間西裝店就快租約到期，我梗係唔做啦，無謂咁樣頂住，時勢唔對路。」
-----------------------------
第三屆最港電影大獎
按此立即投票
-----------------------------
《果GYM》隨身播 健身壹App過！
一按即玩
來源 source: http://hk.entertainment.appledaily.com